Subscribe for ad free access & additional features for teachers. Authors: 267, Books: 3,607, Poems & Short Stories: 4,435, Forum Members: 71,154, Forum Posts: 1,238,602, Quizzes: 344

Here's A Health

Tune--"_Here's a health to them that's awa._"

[The Charlie of this song was Charles Fox; Tammie was Lord Erskine;
and M'Leod, the maiden name of the Countess of Loudon, was then, as
now, a name of influence both in the Highlands and Lowlands. The buff
and blue of the Whigs had triumphed over the white rose of Jacobitism
in the heart of Burns, when he wrote these verses.]

I.

Here's a health to them that's awa,
Here's a health to them that's awa;
And wha winna wish guid luck to our cause,
May never guid luck be their fa'!
It's guid to be merry and wise,
It's guid to be honest and true,
It's good to support Caldonia's cause,
And bide by the buff and the blue.

II.

Here's a health to them that's awa,
Here's a health to them that's awa,
Here's a health to Charlie the chief of the clan,
Altho' that his band be sma'.
May liberty meet wi' success!
May prudence protect her frae evil!
May tyrants and tyranny tine in the mist,
And wander their way to the devil!

III.

Here's a health to them that's awa,
Here's a health to them that's awa;
Here's a health to Tammie, the Norland laddie,
That lives at the lug o' the law!
Here's freedom to him that wad read,
Here's freedom to him that wad write!
There's nane ever fear'd that the truth should be heard,
But they wham the truth wad indite.

IV.

Here's a health to them that's awa,
Here's a health to them that's awa,
Here's Chieftain M'Leod, a chieftain worth gowd,
Tho' bred amang mountains o' snaw!
Here's a health to them that's awa,
Here's a health to them that's awa;
And wha winna wish guid luck to our cause,
May never guid luck be their fa'!


Robert Burns


Poetry