Subscribe for ad free access & additional features for teachers. Authors: 267, Books: 3,607, Poems & Short Stories: 4,435, Forum Members: 71,154, Forum Posts: 1,238,602, Quizzes: 344

Robin

Tune--"_Daintie Davie._"

[Stothard painted a clever little picture from this characteristic
ditty: the cannie wife, it was evident, saw in Robin's palm something
which tickled her, and a curious intelligence sparkled in the eyes of
her gossips.]


I.

There was a lad was born in Kyle,
But whatna day o' whatna style
I doubt it's hardly worth the while
To be sae nice wi' Robin.
Robin was a rovin' boy,
Rantin' rovin', rantin' rovin';
Robin was a rovin' boy,
Rantin' rovin' Robin!

II.

Our monarch's hindmost year but ane
Was five-and-twenty days begun,
Twas then a blast o' Janwar win'
Blew hansel in on Robin.

III.

The gossip keekit in his loof,
Quo' she, wha lives will see the proof.
This waly boy will be nae coof,
I think we'll ca' him Robin

IV.

He'll hae misfortunes great and sma',
But ay a heart aboon them a';
He'll be a credit to us a',
We'll a' be proud o' Robin.

V.

But sure as three times three mak nine,
I see by ilka score and line,
This chap will dearly like our kin',
So leeze me on thee, Robin.

VI.

Guid faith, quo' she, I doubt you gar,
The bonnie lasses lie aspar,
But twenty fauts ye may hae waur,
So blessin's on thee, Robin!
Robin was a rovin' boy,
Rantin' rovin', rantin' rovin';
Robin was a rovin' boy,
Rantin' rovin' Robin!

Robert Burns


Poetry